लिटीबीर अरा टटख़ा खोरका ता एड़ेथ कण्डो

लिटीबीर अरा टटख़ा खोरका ता एड़ेथ कण्डो, गही बखनी झारखण्ड रा:जी ता जिला गुमला, थाना घाघरा, पत्रालय पुटो, पद्दा तिलसिरी गेड़े टोला ता सियाँ नु मंज्ज-केरका तली। इसता अड्डा अक्कु एड़ेथ कण्डो ही ना:मे ती जगआ लगी। अन्ने गा र्इद पुरखा परिया तिम जगोतर रअ़र्इ, पँहेस जोक्क उल्ला गे इदी गही हुदा अरबरकी रहचा। अक्कु र्इ अड्डा नु, ए:ख़ा घली ओ:रे मनना बेड़ा नु अबड़ा पहर्इट तरता पद्दा ती पुजा-धजा नना बरनर। 
र्इ अड्डा पर्इत्त नु पुरखर बखनी तेंग्गनर - उन्दुल ओरोत जों:ख़स ए:ड़ा-अड्डो ख़ा:पा गे टटख़ा खोरका तरा केरका रहचस। आस ए:ड़ा-अड्डोन मेनताअ़नुम टटख़ा खोरका गड्डी ख़ल्ल मझी ता टुकू नू उक्कीयस। ए:ड़ा अड्डो निरदन मेना लगिया। धरमे गहि कमचका मन्न-मास, टुङरी, ख़ल्ल, झुण्डु गुट्ठिन हरियर ए:रर आस गहि जिया हूँ हरिया:रा केरा, ख़ने आस धरमे संवग गही महबा पा:ड़ा हेल्लरस। एड़पा किर्ररर मण्ड्डी ओण्डका ख़ोख़ा बिडिरयस अरा चाँ:ड़ेम ख़न्दरस केरस। मा:ख़ा बा:री आ जों:ख़स गे तुंगल नु, टटख़ा खोरका टंगरा-टुकु गुसन ओण्टा पिण्डा अरा झण्डी एत्थरा। तुंगुल नु धरमे संवग तरती चा:ल ख़क्खरा - ‘अना बेटा‘ निंग्गन ओण्टे अड्डा ए:दआ लगदन। इसन बरके दरा अम्म अरगाअ़के, होले निमहँय दुक्खे़ बोङ्गो का:लो। होरमा आ:लारिन इबड़ा कत्थन तेङके। एका आलर गहि दुक्ख़े रओ आरिन तेङके का - र्इ अड्डा नू तूसा ता ओन्द अंर्इजरा अम्म चिओर दरा अरगोओर अत्त्ाुकिम आर गही दुक्ख़े बोङ्गो का:लो। र्इ टुकु अबड़ा गने ओन्टे पिण्डा कमके (चा:जके) अरा झण्डी गड़के, असानुम अम्म चिअ़के दरा ओहरा-गोहरा ननके। 

र्इ तुङुल आस गहि जिया नू उक्कया केरा। आस हुरमी कत्थन ओ:रे ती एड़पा नु तिङयस अरा गेड़े टोला ता पचगीरिन हूँ तिङयस मुन्दा र्इ कत्थन ने हूँ मल घोख़चर। नन्ना उल्ला आस गे फीन तुङुल ख़क्खरा का आ ए:दका अड्डा धरम अड्डा हिके। एका बा:री कुँड़ख़र गे दुक्खे़ रहचा आ बा:री धरमे बंग्गस आ:लर ही दुक्खेन नठाबअ़आ गे धरमी सवंग मनर ठेपरा जों:ख़स ही छाव नु एड़ेथ-कन्ना धरअर र्इ डहरे तिम केरका रहचस। 
बअ़नर पुरखा परिया नु सारू परता ता सराहरा सिम्बाली मन्न नु सोनो गिधि अरा रूपो गिधि कुँड़ख़र गहि उगता पगसिन ख़ोता अट्टा लगिया, आ:लररिन चरा कम‘आ लगिया दरा  उल्ला गइनका कुँड़ख़र ख़ेखे़ल नु नठरआ लगियर। अरदा मल पूर्चका आ:लर धरमेस गुसन अँड़सा लगियर, ख़ने धरमेस घोख़चस - का र्इ सोनो अरा रूपो गिधिन मल लवचका ती गोट्टे आ:लारिन मुंज्जो चिओ। एन्ने घोखअर धरमेस ओन्टे ठेपरा जों:ख़स (लिटी बीर) गही छाव नु खे़ख़ेल नु इत्तियस। र्इ ख़ोख़ा बांस गही नलख ननुर गुया का:लर, कोंहा-कोंहा एड़ेथ-कन्ना कमताचस। अन्तिले एड़ेख (धनु) कन्नन धरअर पुरबे रा:जी ती पछिमे रा:जी तरा सराहरा सिम्बाली मन्न, सारू परता का:ला हेल्लरस। का:नुम-का:नुम उख़िया केरा ख़ने ओन्टे गुनी पच्चो गुया पाही रहचस। ख़ने पच्चो मेंज्जा - एन्देर गे एमहय रा:जी बरचका रअ़दय बेटा ! पच्चो गही मेनतन मेनर आ ठेपरा जों:ख़स (लिटी बीर) हुरमी कत्थन ओ:रे ती तिंग्गयस चिच्चस। गुनी पच्चो घोखचा का सेयान कुक्कोसिन सारू परता मल का:ला चिओन, एन्देर गे का सोनो अरा रूपो गिधि आसिन मो:ख़ो चिओ। एन्ने घोखअर एड़ेख़-कन्ना नु घ्ाूनन (ख़ोस्सो) सज्जा चिच्चा। भइर मा:ख़ा नु घ्ाून, एड़ेख़-कन्नन ठोस्सो नंज्जा चिच्चा। नन्ना उल्ला ठेपरा जों:ख़स (लिटी बीर) पन्ना धुक’उर गुया केरस अरा ओन्द मन गहि एड़ेख़-कन्ना कमताचस की सारू परता तरा का:ला हेल्लरस। किर्रो बा:री उख़िया ख़ने आ गुनी पच्चो गुयम पा:ही अँड़िसयस। मा:ख़ा बा:री गुनी पच्चो आ एड़ेख़-कन्ना नु हूँ घ्ाूनन सजआ बिद्दया। पन्ना गहि ए:ड़ेख़-कन्ना चड्डे अदिन ठोस्सो नना पोल्ला, पँहे आ गुनी पच्चो गही उरमी पल्ल एस्सरा केरा अदि संग्गेम हुरमी घ्ाून हूँ केच्चा केरा। पइरी ठेपरा जों:ख़स (लिटी बीर) सारू परता तरा का:ला गे उरखा हेल्लरस, ख़ने गुनी पच्चो बा:चा - अना बेटा ओन्दा डहरे खरचा होअ़ते कला, डहरे नु ख़ोसरा गुसन कड़िरका ननके दरा मो:ख़के। अन्तिले आस आ गुनी पच्चो गही बा:चका बेसेम पोटोङन धरअर असते उरखस। ख़ोसरा अँड़सर की पोटोङ कोल्लदस खने ए:रदस का अर्इया केच्चका घ्ाून (ख़ोस्सो) अरा एसेरका पल्ल र‘र्इ। सेयान कुक्कोस बुझरस केरस का आद तंगहय रोग-बलयन ख़ाड़ नु बोहाबआ गे चिच्चकी र‘र्इ। ख़ोसरा कट्टर, का:नु-का:नुम आस टटख़ा ख़ोरख़ा सियाँ अँड़िसयस। आस गे अम्म ओनका लग्गिया केन्धल ख़ने ओन्टा टुकु नू एड़ेख़-कन्नन उइय्यस दरा तूसा ता पझरा अम्म ओनर की असते सारू परता तरा चला केरस। कालते-कालते आ धरमे कुक्केास सारू परता अँड़सियस। कुक्कोसिन ए:रर एँ:ड़ो गिधि झपटार‘आ गे बरचा। पँहे धरमी कुक्कोस तंगहय एड़ेख़ नु कन्नन तिगाबाचस दरा ओङओलनुम एँ:ड़ो गिधिन लवचस चिच्चस। सोनो अरा रूपो गिधि गहि कुक्क खण्डरा केरा। अदि ख़ो:ख़ा एँड़ता कन्ना ती सोनो गिधि गही खोतन लवचस अरा मून्ता कन्ना ती कोंहा ले सराहरा सिम्बाली मन्नन ओंद रज्झ नु खत्ताचस चिच्चस। सोनो अरा रूपो गिधि गही लवरका ही खबइर मेनर होरमा आ:लर खुामार‘आ हेल्लरर का - अक्कु नम्हय रा:जी किर्रया, अक्कु नमहँय ख़द्द-ख़र्रर बछरओर। अउलातिम कुँड़ख़र फग्गु पुनर्इ चन्द्दो नू सिम्बाली डा:ड़न गड़नर दरा फग्गु खण्डनर अरा नन्ना उल्ला पुना चान मनाबअनर। बिपइत बोङ्गा बअर आ:लर धू:ली नू उलुन्डारर-पोत्तरर। बिपइत बेड़ा नू धरमे सवंगन गोहरारनूम दव कुना नना ओना अरा उल्ला खेप‘आ हेल्लरर। बअ़नर टटख़ा ख़ोरख़ा गुसता आ पखना टुकू ता ए:ड़ेथ चिनहाँ आ ठेपरा जों:ख़स (धरमी कुक्कोस) गही उइका ए:ड़ेथ गही चिनहाँ दिम तली़।

ए:ड़ा ख़ा:पू जों:ख़स गहि अन्ने तुङुल गही कत्थन बंझुरका ख़ो:ख़ा पद्दा ता आ:लर जुम्मरर दरा ए:रा केरर। मा:निम असता पखना टुकु मर्इयाँ एड़ेथ (धनु) ही चिनहाँ रअ़र्इ। अक्कु नितकीम बिफे उल्ला आ एड़ेख़ कंड्डो गुसन झण्डी गड़अर अम्म तुंद्दा का:नर। अक्कु बेड़ा किर्रया केन्धल - जे ए:ड़ेथ-कन्ना गहि चिनहाँ दहदर मंज्जा दरा धरमिर गे एत्थरा अरा सा:रतारा। अक्कु असन पद्दा-ख़ेप्पा ता आ:लर एड़ेथ कंड्डो गहि डण्डी पाड़नर -                 
टटख़ा खोरका एड़ेथ कंड्डो,                            नम्हय मझी बिलचा लगी रे।                              टटख़ा खोरखा नू एड़ेथ-कन्ना,                         नम्हय मझी बिलचा लगी रे।                            टटख़ा ख़ोरख़ा नू धुमकुड़िया,                            नम्हय मझी बिलचा लगी रे।                            टटख़ा खोरका नु धरम तू:सा,                            नम्हय मझी बिलचा लगी रे।                         
गेड़े टोला ता नयगर बअ़नर - एकअम आ:लर गहि बिपइत रओ, आर बरओर दरा इसन अम्म चिओर होले आर ही दुक्खे़ मा:निम बोङगो का:लो।
(टू:ड़ूस : सय भुवनेश्‍वर उराँव, तिलसिरी टटख़ा टोला, घाघरा, जिला : गुमला)