KurukhTimes.com

कुँड़ख़र ही कुड़ा-मो:ख़ा सिखिरना अरा सिखाबअ़ना

बअ़नर - हुल्लो परिया नु नमहय पुरखर टोड़ंग-परता अरा नाल-झरिया अबड़ा गने रअ़नुम नमन बछाबा:चर। आ बेड़ा नु कन्दा-ख़ंजपा गुट्ठिन बेगर बी:तकम मो:ख़ा लगियर। अहड़न हूँ ख़े:नम मो:ख़ा लगियर। कूल गे की:ड़ा लग्गो दिम अरा जिया गे अम्म ओनका लग्गो दिम। अवंगे कूल-की:ड़ा अरा अम्म ओनकन मेटाबआ गे टोड़ंग परता ता ख़ंजपन मो:ख़र दरा झरिया ता अम्मन ओनर बेड़न खेपचर।

बअ़नर - आ बेड़ा नुम नमहँय पुरखर टोड़ंग-परता ता ख़र्इका बाँस गही घसड़ारना ती - चीं .... चीं ..., चीं .... चीं .... बेसे ख़रख़नन मेना लगियर। अन्ने गा का:ना-बरना डहरे-बाट नु आ लेखे ख़रख़ना गा हुल्लो तिम मेंदेरआ लगिया। पँहे उन्दुल भरखर बिड़ना बेड़ा नु आ बांस झुण्डू लवकारआ दरा बिलचा हेल्लरा अरा बछरका हरियर बांस झुण्डु हूँ आ हन्दकारना नु मुरझारअर खतरआ हेल्लरा। आ:लर एलचा-एलचा तरकूटी बोंग्गा हेल्लरर। आ बेड़ा गूटी आर अन्ने आ:लोन, का अन्ने अलहन मल र्इ:रका रहचर। आ अलहन हुरमी उज्जना लव-लड़ंग अरा मन्न-मा:सन खत्तआ लगिया दरा ओ:लनुम उरमी खेआ लगिया।

बअ़नर - नमहँय पुरखर आ पुना अकलक मंज्जकन र्इरयर अरा र्इलचियर केरर। आ बा:री हया-दन्दा मन्नुम आ आलोन - चीं ... चीं ..., चीं ... चीं .... मेंदेरना अड्डा ती उरूख़का ही ना:मे ती चिच्च पिंज्जयर अरा अदी गने उल्लका ती बछरकन चिन्द बा:चर। आ टोड़ंग ता लघरका चिच्च ती उरमी उल्लिया केरा। ओना-मो:ख़ा गे ख़ंजपा गुट्ठी नट्ठरा केरा। आ:लर कूल-की:ड़ा तुरू र्इलहो-बिलहो मना हेल्लरर। टोड़ंग किंको गुट्ठी हूँ मल ख़खरआ हेल्लरा। अन्ने नु दरबड़या उल्लका टोड़ंग किंको गही अहड़़न मो:ख़र तमहँय जिया-कयन बछाबा:चर। मुन्दा आ उल्लका अहड़ा, आर गे अकय सोन्दहा अरा कोड़े लग्गिया। उल्लका अहड़ा, ख़े:ना अहड़ा ती मो:ख़ा गे अरा कूल गे पचाबअ़ना नु हूँ सेब्बा लग्गा हेल्लरा। अन्ने नु आ चिच्चन पसङी नना-नना बछाबा:चर अरा अजगो-इजगो ती अहड़ा बेद्दा-ओन्दोरआ की अदिन चिच्च नु कुड़ा हेल्लरर। र्इ लेखे आर तमहय मझी, ख़े:ना अहड़ा मो:ख़नन रहे-रहे अम्मबा हेल्लरर। आर गे अहड़न कुड़ना-मो:ख़ना दव लग्गा हेल्लरा। मुन्ध नु आर तमहँय खोंड़हा ता आ:लारिन अहड़न कुडा-मो:ख़ा गे अख़ता:चर। अबड़ा पुना ढचर अरा चा:लो टोड़ंग ता ख़र्इका अतख़ा बेसे ख़रख़रनुम गेच्छा रा:जी गूटी का:ला हेल्लरा। नमहँय पुरखर ही र्इरका-नंज्जका धतमन, नन्ना रा:जी ता आ:लर अरा नन्ना खोंड़हा ता आ:लर हूँ इबड़न इंज्जरर। ख़े:ना अहड़न कुड़ना-मो:ख़ना गे सिखाब’उर दिम - कुड़ा-मो:ख़ा अक्कन ख़ने कुड़ख़न, कुड़ा-मो:ख़ा अक्कम ख़ने कुड़ख़म, कुड़ा-मो:ख़ा अक्कत ख़ने कुड़ख़त, कुड़ा-मो:ख़ा अक्कय ख़ने कुड़ख़य, कुड़ा-मो:ख़ा अक्खर ख़ने कुड़ख़र बाता:रर।

अक्कुन ता बेड़ा नु हूँ कुड़ख़र तमहँय पुरखा चा:लो अरा ने:ग-दस्तुर ननो बा:री एकअम आ:लोन धरमे ही ना:मे ती, का धरती अयंग ही ना:मे ती, का धरमी सवंग ही ना:मे ती सिरनी चिअ़नर होले, अदी गही करजन चिच्च नु कुड़नर दरा अरगाअ़नर, तबेम आर गही पुजा मुंजुर’र्इ। चा:ला टोंका ता दाँ:ड़े अरगाचकन कुकोय ख़द्दर अरा मुक्कर गे मल चिअ़तार’र्इ। डण्डा कट्टना ननो बा:री निरमूँही दाँ:ड़े चिच्चका बी:यन ख़े:ता नु उर्इयर चिच्च नु कुड़आ नननर, तसले अदी नुम किच्चनर-अरगाअ़नर, तबेम आ ने:ग मुंज्जा मनी। र्इ किच्चना-अरगाअ़ना दाँ:ड़ेन कुकोय ख़द्दर अरा ख़दमा:ख़ो मुक्कर गे मल चिअ़तार’र्इ। इदिन कुक्को ख़द्दर, मे:तर अरा पर्इच्चका अज्जी मुक्कर गे भर्इर चिअ़तार’र्इ। र्इन्ना गूटी नमहँय पुरखर आ बेड़ा ता अकलक अरा ससर्इतन तेंग्गा-बुझुरआ गे तमहँय ने:त-दस्तुर गने जो:ड़अर उर्इका रअ़नर। मना उंग्गी का जोक्क आ:लर गे एन्ने ने:त-ने:ग मलकोड़े लग्गो हअन, पँहे र्इबड़द गा नमहँय पुरखर गही र्इरका-नंज्जका दरा तिंग्गका तली।

(टू:ड़ूस : डा. नारायण उराँव ‘सैन्दा’, जिला : गुमला)

Sections