फग्गु परब ही ख़ीरी/धुमकुड़िया ही मुंधता ख़ीरी (फग्गु पर्व तथा धुमकुड़िया के आरंभ की कुँड़ुख़ लोक-कथा)

बअ्नर हुल्लो परिया नु कुँडु.ख़ खोंड़हा अकय ससर्इत नु रहचा। ओण्टा सोनो गिधि (ॅीपजम अनसजनतम) आल जियन केरमे-केरमे पिटा-मुंज्जा लगिया। आद आ:लर गही उगता-पगसिन ओन्टे कोहाँ ले सरा-हरा सिम्बाली मन्न नु खोता कमआ लगिया अरा आ:लारिन नेप्पा-नेप्पा खोता मइय्याँ पिटा-मोख़ा लगिया। एका-एका से उल्ला कट्टा लगिया अन्नेम नितकिम ओरोत आल जिया खोंडहा ती नठारआ लगियर। गोट्टे खोंड़हा नु हुही चू:चकी रहचा का ओन्टा सोनो गिधि बरर्इ दरा ओरोत आल जियन निप्पी-पिसी दरा पिटी-मू:खी। खोंड़हा ता आ:लर जुलुम जुट्ट लग्ग र्इरयर पहें अदिन लवआ पोल्लर। सोनो गिधि अंजखंज परता मझी कोहाँ ले सिम्बाली मन्न मर्इय्याँ तंगआ खोता कमआ लगिया, एकसन अँड़सर की अदिन लवअ्ना, खोंड़हा ता आ:लर गे मसकिल मंज्जकी रहचा। आर अदिन लवआ गे पद्दा गर्इनका जुमुरअर की सेन्दरा बे:चा लगियर पँहे अदिन लवआ पोल्लर। अदि ख़ो:ख़ा सँबसे ख़ोंड़हा जुमुरअर की बिसु सेन्दरा नंज्जर पँहे अन्नु हूँ अदिन पिटा पोल्लर।

    अन्तिले खड़िदयर - हा:रचर की धरमे सिन गोहरारआ हेल्लर - अना धरमे, नीन एमन ओरमारिन सिरजन - बिरजन नंज्जकय अरा पोसआ-पर्दआ लगदय। नीन उरमी नु उंग्गु अरा ओरमर ही उरबय तलदय। नीनिम एमन बछाबअ्दय नेकआ। ए:म गा एमहय पया-पूरती नंज्ज र्इ:रकम पहें ससर्इत ती उरखा पोल्लकम। ए:म ने:कन हूँ ससर्इत मल ननदम पँहे ए:म ससर्इत ती बछरआ पोल्ला लगदम। अक्कु धरमे निंगहय दिम भरसा, निंगहय तिम असरा, नीनिम एमन अरा आल जियन बछाबअ्दय नेकअन। 

    गोट्टे आल ख़ोंड़हा का, कुँड़ुख खोंड़हा ही एन्ने भभनारना मलता ओहरा बिनती ननना धरमे संवग गूटी अँड़िसया केन्धल अरा रा:जी किर्रना ही बेड़ा बरआ हेल्लरा। धरमेस ही लिला, का धरमे सवंग गही छया-भया ! उन्दुल ओन्टा ठेपरा ले जों:ख़स डेरा-बसा बेद्दा गे ओन्टे पद्दा अँड़िसयस। बअ्नर आ कुक्कोस ही मुहटन ए:रर पद्दा ता जों:ख़र अनभनियाँ अलखनर अरा आ:सिन चिड़िगनुम-पड़गनुम पद्दा ती तरकूटी नना चिअ्आ लगियर। एन्नेम र्इ पद्दा ती आ पद्दा मन्नुम-मन्नुम धुँधरूक मना हेल्लरा। बी:ड़ी पुत्तना बेड़ा नु आस ओन्टे पद्दा कूटी ता ओन्टे रँड़याही पच्चो ही एड़पा अँड़िसयस। असन अँड़सर आस पच्चो हेद्दे मा:ख़ा बारी रअ्आ गे ओहरा नंज्जस्। पच्चो बा:चा - बरा जुनु अन्ति बेटा, एंगहय गा ख़द्द न ख़र्रा, नीन रअ्ओय होले एंग्गा हूँ द:व लग्गो अरा एंग्हय जिया हूँ सा:लो। अन्तिले आ ठेपरा जों:ख़स रँड़याही पच्चो गही एड़पा नु रअ्आ हेल्लरस। पच्चो ही एड़पा नु मल रअ्ना बारी आ जों:ख़स पच्चो ही एड़पा ता नलखन पँड़सा चिअ्आ लगियस। पच्चो लस्सी नना गे बहरी का:लो का ओना-मोख़ा गे खुरजी समा नना का:लो होले आ जों:ख़स एड़पा ता नलखन चेमचेम ले नंज्जका रअ्ओस। पच्चो हूँ आस ही नलखन ए:रर खुसमा:रआ लगिया अरा तंग नत्तीस लेखआ घोखअर की आ:सिन एमतअ्आ ख़जरतअ्आ हेल्लरा। पच्चो ही एड़पा नु रअ्नु-रअ्नुम आ जों:ख़स चेमचेम लेकन रआ हेल्लरस। अन्तिले आस पद्दा ता जों:ख़र पेल्लर गने ओक्का-र्इजआ हेल्लरस अरा ख़द्दारिन रँड़याही पच्चो ही एड़पा नु ओन्द कू:टी । सेन्दरा बे:चना नु आस पंखराज रहचस। अवंगे पद्दा ता जों:ख़र आ:सिन पर्इत्तआ हेल्लरर अरा सेन्दरा बेचना नु मुन्धहारे नना हेल्लर। आस ओन्द रज्झ नु कोंहा-कोंहा तोम्बन खण्डा चिअ्आ लगियस। एकअम कोहाँ बनयाँ किंको आस ही छमहें ती कट्टा पोल्ला लगिया। सेन्दरा बे:चना नु पंखराज रअ्ना चड्डे पद्दा-ख़ेप्पा अरा अहटा-पहटा ता जों:ख़र-पेल्लर आस गही कत्थन मेना हेल्लरर। ठेपरा जों:ख़स हुं ओरमा ख़द्दर अरा जोंख़-पेल्लारिन अनआ-मनआ दव कत्था अरा लूरन तेंग्गा लगियस। ठेपरा मननु हुं पंखराज अरा लूरगर मनना चड्डे आ:सिन खोंड़हा लिटि बीर बअ्आ हेल्लरा। खोंड़हा नु बरना अरा खोंड़हा गने रअ्ना ओन्द बछर (12 चन्नदो) पूरआ लगिया। उन्दुल खोंड़हा ता आ:लर आ रँड़याही पच्चो ही एड़पा बरचर दरा पच्चोन चिड़िगयर अरा बा:चर - निंग नत्तीस लिटि बीर भर्इर बा:रओस का नलख हुं ननोस। निंग नत्ती सिन आ:नय, आ:सिम र्इ ससर्इत ती बछरना गही उपर्इ-पतर ननोस। अन्तिले पच्चो लिटि बीर सिन बा:चा - एरा नतिया अक्कु नी:निम खोंड़हन उबार नना ओंग्गोय।

     पच्चो अरा पद्दा ता आलर गही कत्थन मेनर आ जों:ख़स पद्दियारिन धिरजा (ढाढ़स) चिच्चस का - आस आ सोनो गिधिन पिटोस दरा नठाबअ्ओस चिअ्ओस। आ लिटिबीर ठेपरा जों:ख़स बा:चस - एंग्गा ओन्द मन (40 सेर) गही ओन्टा एड़ेख़ (धनु) कमत्आ अरा अधा मन (20 सेर) गही मून्द (तीन) गोटंग कन्ना अरा ओन्द मन गही ओने टोंग’ए कमत्आ चिअ्आ। जों:ख़स गही कत्थन मेनर ओरमा पद्दियर आ जों:ख्स गही आर्इनका बेसेम एड़ेख़-कन्ना अरा टोंग’ए कमत्आ हेल्लरर। इबड़ा संजगी कमरका ख़ो:ख़ा पद्दियर संघड़ा नना-नना जों:ख़स गही रअ्ना अड्डा गुसन ओन्दरर। सोनो गिधि हूँ पँइय्या गलि मुँजुरना ख़ोख़ा बिड़ना गलि ओ:रे मनना बेड़ा नुम अन्धवारनुम बरआ लगिया अरा आ:लारिन नेप्पा-पेसा लगिया। एन्नेम बेड़ा कट्टिया अरा सोनो गिधि ही ससर्इत बेड़ा अँड़सा हेल्लरा। पर्इयाँ बोंग्गना अरा बिड़ना ओरे मनना बेड़ा नु सोनो गिद्ही बरचा अरा आ सरा-हरा कोहाँ सिम्बाली मन्न नुम खोता अट्टिया अरा बी टिड्डका अरा लेद्दा ख़द्दर ही उड़ान मनना गूटी खोता नुम तंगआ ख़द्दारिन पो:सआ गे आलारिन नेप्पा-पिटा की चरा कमआ लगिया। इबड़ा कत्थन पद्दा ता जों:ख़र आ लिटि बीर ठेपरा जों:ख़ासिन ओ:रे तिम तिंग्गयर। इजगो लिटि बीर ठेपरा जों:ख़स ही डिड्ढ़ ती (साहस से) पद्दियर सेन्दरा बे:चा ओरे नंज्जर। अंजखंज परता मझी सुरंग ले कोंहा सिम्बाली मन्न मर्इय्या अरगना नरमहा आलर गे बार्इह पोल्ला मना लगिया। अदि संग्गेम सोनो गिधि गही खिलपर्इत, एका तरती बरओ दरा ने:कन पेसो की होअ्ओ अदिन ने हूँ अख़आ पोल्ला लगियर। अन्ने बेड़ा नु आ सिम्बाली मन्न गुसन का:ला गे ओरमर एलचा लगियर। एन्नेम कुद्दनुम-नुंग्गनुम का तवगर र्इरनुम एँ:ड़ उल्ला (दो दिन) कट्टिया केरा। मून्दता उल्ला सेयान जों:ख़स तंगआतिम आ ओत्था टोंग’एन धरचस दरा टोडं़ग-परता ता अंजखंज अड्डन चतरआ ओ:रे नंज्जस। अंतिले अड्डा कमअर आ ओत्था एड़ेख़-कन्नन असन होच्चस। परता मर्इय्याँ चपर्इल मझी एन्ने अड्डा कमचस का सोनो गिधि गे ए:रा-नेप्पा खतरी मसकिल मंज्जा केरा। भर्इर उल्ला अजगो-इजगो मन्नुम कटिटया अरा सोनो गिधि हू दव ले खोता नु मल उक्की रहचा। ओ:ड़ा-ख़ा:ख़ा ही खोता नु किर्रना बेड़ा मना लगिया। आ बेड़ा नुम सोनो गिधि तंगहय खोता नु अंड़िसया। इजगो लिटि बीर ठेपरा जों:ख़स मूनता कन्ना तुरू रज्झ ले सोनो गिधि गही खोतन खत्ताचस, अदि ख़ो:ख्ा एँड़ता कन्ना ती ओन्द रज्झ नुम आ कोंहा सिम्बाली मन्नन हड़-हुड़ ना खत्ताचस चिच्चस। खोता अरा डेरा बसन नठारका ए:रर सोनो गिधि अंधवारनुम आलर मर्इयाँ मंडरारआ हेल्लरा, मुन्दा लिटि बीर ठेपरा जों:ख़स ही तिंग्गका उरजिस ती ओरमर तंगअन बछाबअ्आ उंग्गियर। मुंज्जा नु सेयान जों:ख़स मून्दता कन्ना ती सुपट थिथाबाचस दरा अदिन लवचस-खत्ताचस। इदि ख़ो:ख़ा ओरमर असन जुम्मरर की आ सिम्बाली मन्नन अरा सोनो गिधिन दगचर अरा बस्सियर की एड़पा किर्रया। नन्ना उल्ला पर्इरी बा:री ओरमर तमहँय रा:जी किर्रया बअर धरमेस ही नामे ती पुजा-धजा नंज्जर अरा ओण्डर-मोक्खर दरा नलियर बिच्चयर। नन्ना उल्ला ओरमर पद्दा-ख़ेप्पा अरा अहटा-पहटा तर जुम्मरर की लिटि बीर सिन बेलख़ा ता बे:ल चा:जा गे बिद्द र्इरयर पहेंस बेद्दा पोल्लर। लिटि बीरस ही खोंड़हा नु बरना ओन्द बछर इदातो 12 चान मंज्जकी रहचा। अवंदा बेड़ा नु आस कुंड़ुख़ खोड़हन दव कुना सइमटा:चस, ससर्इत ती बछाबा:चस दरा डहरे ए:दअर तंगहय रा:जी किर्रयस केरस। अख़’उर बाअ्नर आस देव आलस तलियस। आ:लर ही गोहरा:रना ती धरमे सवंग मया ननु देव का मय्हदेवस ही रू:पे नु आ:लर गुसन तर्इका रहचस। धरमे सवंग आ:लारिन एका रू:पे नु मदर्इत ननी का एका रू:पे नु दिसतार चिर्अ्इ अदिन ने हुं पोलनर तेंग्गा। बेड़ा कट्टी, धरमेस ही लिला ए:दना मुंज्जुर’र्इ, अदी ख़ो:ख़ा खोंड़हा र्इंजिर’र्इ का आद धरमे ही दिम छया-भया रहचा। र्इ लेखे धरमे सवंग खोंड़हन बछाबअ्आ गे अवंदा उल्ला आ:लर मझी रअर खोंड़हन लूर-घोख चिअर डहरे पंदचस चिचचस। आ बेड़ा तिम धरमे सवंग ही तिंग्गका अड्डा अरा धरमे सवंग ही धरता:चका घोख बा:रनुम धरम कुड़िया ती धुमकुड़िया बाता:रा।
 
    अक्कुन ता बेड़ा नु हूँ कुँडुख्र्, कुँडु़ख़ पद्दा नु फग्गु खण्डरना उल्ला सिम्बाली मन्न गही डा:ड़न ओन्दोरनर दरा खण्डनर-बस्सनर, अन्तिले नन्ना उल्ला पुजा-धजा नन्नर दरा रा:जी किर्रका बेड़ा बुझुरनर। बअ्नर, धुमकुड़िया कोरोचका पुना जों:ख़ारिन फग्गु सेन्दरा गेम पद्दियर सेन्दरा बे:चा गे संग्गे नना लगियर अरा नननर।          
संकलन - अद्दी कुँड़ुख़ चा:ला धुमकुड़िया पड़हा अखड़ा।

(डॉ नारायण उराँव, सैन्दा, सिसई, गुमला)