KurukhTimes.com

कुँड़ख़र अरा सोहराई परब

हुल्लो परिया ता कत्था तली। टोड़ंग-परता मजही नू ओण्टे पद्दा रहचा। आ पद्दा ता उरमी आलर-तेःलर‚ अड्डो-मेक्खो‚ ओःड़ा-ख़ोःख़ा– जिया-जउँत दव कुना उज्जा-बिज्जा लगिया। बअ़नर - आल जिया उरमी उल्ला ओण्टे बेसेम मल रअ़ई। एका तरती एन्देर ताःका बरचा का अन्ति धरमे ही छया-भया। आ बेड़ा अनभनियाँ राःजी कीःड़ा मंज्जा। चेंप-झड़ी मल मंज्जका ती केरमे-केरमे आःलो गुट्ठी ओनना-मोख़ना मलका चड्डे रोःगे बलय ती खेअ़आ हेल्लरा। एका एका अड्डा नु आःलर कूल कीःड़ा ती केच्चका अड्डो गही डंगरा अहड़न हूं मोःख़ा ओःरे नंज्जर दरा ओःड़ा-ख़ाःख़ा अरा टोड़ंग किंकोन पिटा-पिटा मोःख़ा हेल्लरर। एन्ने बेड़ा बरचा का ओये गही दुदही हूँ बत्ता हेल्लरा। ओःये गही दुदही बईत्तका ती आःलर दुदही गे सीःबा ख़ाःरा हेल्लरर। अड्डो-मेक्खो ही अरदा मल पूरचका नुम खेअ़ना ती धरमेस गे हूँ दव मल लग्गिया केन्धोल‚ का अन्ति धरमेस ही छया-भया‚ का अन्ती आल जियन डहरे तेंग्गना ही बेड़ा रहचा का‚ अदिन गा धरमेस दिम अख़ओस। एन्ने हुँ बातार’ई का आ बेड़ा तिम जोक्क-जोक्क आःलर डंगरा अहड़ा मोःख़ना ओरे नंज्जर। आ मझिम जोक्क आलर अड्डो-मेक्खो गही डंगरा अहड़न बाःया नक्खरर।

एन्ने बेड़ा नुम उन्दुल ओरोत सेयान झुबलु जों:ख़स परता तरती ओण्टा अँड़िया अड्डो गने कुँड़ुख़ बखड़े नु बरचस। अजगो-इजगो कुद्दनुम-नुंगनुम बीःड़ी पुँइदना बेड़ा नु बखड़े ता एड़पा उरबर गुसन अड्डोन मंक्खा गे अड्डा बेद्द ईःरयस पँहेंस ने हूँ अड्डा मल चिच्चर। अँड़िया अड्डो गने आ जों:ख़स गही मुहटन एःरर दरा तीःना ख़ाँ:ड़नुम बखड़े ता एका एड़पा नू हूं आस गे अड्डा मल चिच्चर। मुंज्जा नु आस ओरोत रँड़याही पच्चो गुसन अँड़सियस अरा बाःचस - अनय अज्जी‚ से इन्ना माःख़ा एःन निंगहय एड़पा नू पाःही रओन। ख़ने पच्चो बाःचा - बरा जुनु अन्ति नतिया ! एंगहय गा आलय ना तेःलय‚ अड्डो ना मेक्ख़ो‚ एःन ओतोख़ एका रअ़एन ! रओय होले बरा जुनु ! एन्ने ब’अर पच्चोद आ झुबलु जों:ख़स गही अँड़िया अड्डोन उला मंक्खिया दरा अम्म ओनता:चा‚ जों:ख़स गही ख़ेड्ड नूड़िया अरा ओक्का गे कण्डो चिच्चा दरा बाःचा - अना नतिया‚ एंगहय गुया ओना मो:ख़ा गे दव-दव जिनिस मल्ला‚ से एन्देर ननोन‚ एन्देर मला। पच्चो गही कत्थन मेनर जों:ख़स बाःचस - अनय अज्जी‚ नीन एन्दरन ओनोय-मोख़ोय अदी नुम एंग्गा हूँ चिअ़के। अन्ने बअर आ जों:ख़स असन रअ़आ हेल्लरस। पच्चो बढ़ा नना का:लो‚ का बनी-भुती नना उरखो होले आ जों:ख़स एड़पा ता नलखन चेमचेम ले नंज्जका रओस। अदि ख़ोःख़ा अँड़िया अड्डोन ख़ाःपा गे टोड़ंग तरा बखड़े ता अड्डो-मेक्खो गने होआ लगियस। जों:ख़स ही एड़पा नु रअ़ना ओरे मंज्जका ख़ोःख़ा पच्चो गही एड़पा नु बराकईत मना हेल्लरा। आद बढ़ा नना काःला लगिया होले अदि गे बग्गे-बग्गे ख़ेस्स गुट्ठी ख़खरआ लगिया। मण्डी बीःतआ लगिया होले जुक्की तीख़िल तिम मण्डी बग्गे मना काःला लगिया। इबड़न एःरर पच्चो हूँ हया-दंदा मना लगिया‚ पँहेस छछेम रईह केरा। एन्नेम जों:ख़स नितकिम अँड़िया अड्डोन ख़ाःपा गे टोड़ंग तरा होआ लगियस होले एड़पा किर्रो बीरी आ अँड़िया अड्डो गने टोड़ंग तरती बछिया गुट्ठी हूं बरआ लगिया दरा उरमिद पच्चो गही चाःली-गोंयसाली नू रआ लगिया। ई लेखे बेड़ा कट्टनु- कट्टनुम पच्चो गही चाःली-बली नु ओये अरा बछरू-बछिया ती नीं:दा हेल्लरा। इजगो बेलख़ा ता आलर गही ससईत बढरतेम काःला लगिया। ओये गुट्ठी गही दुदही हूँ ख़ाःया लगिया‚ अवंगे पुना बछरू गुट्ठी हूँ लेड़पोयाँ मना हेल्लरा अरा चाँ:ड़ेम ख़ेआ लगिया। आ बेड़ा नुम ख़द्दमाख़ो आःलिर गही दुदही हूँ बत्ता हेल्लरा। एन्ने ती आःलर गे ख़द्दारिन पोःसना बलय मना हेल्लरा। मुन्ध नु एका आःलिर गही दुदही मल पूरआ लगिया आर ओःये गही दुदही ती तमहय ख़द्दारिन पोःसआ लग्गियर। पहें ओःये ही दुदही मल मनना ती आःल ख़द्दारिन हूँ पो:सना बलय मना हेल्लरा।                 

सँवसे राःजी नु एन्ने मनना ती ओरमर गे ससईत मंज्जा केरा। मुन्दा‚ पच्चो गही एड़पा अड्डो-मेक्खो ती नीं:दा लगिया। ख़द्दमाःख़ोर तमहँय ख़द्दर गे पच्चो गुसते दुदही होआ-होआ ख़द्दारिन पोःसआ लगियर। इबड़ा कत्थन अख़अर पद्दा ता मुद्धा आःलर पच्चो गुसन अँड़िसयर अरा बाःचर - निंगहय एड़पा नु रअ़उ जों:ख़स नेमहाँ आःलस तईलदस़‚ अंवगे निगंहय बराकईत मना लगी। नीन आःसिन पद्दा ता इबड़ा ससईतन खोंड़हा ती बोंगतअ़आ गे उपई-पतर मेनके। मुद्धा पद्दियर गही कत्थन मेनर पच्चोद सेयान झूबलु जों:ख़ासिन आ:नियां - अना नतिया‚ पद्दियर मेना बरचका रहचर का बेलख़ा ता ससईतन एका बेसे बोगंताअ़ना मनो‚ का एन्देर ननना मनो अदिन तेंग्गोय चिओय होले आःलर गे दव मनो। पच्चो गही आईनकन जों:ख़स छछेम मेंज्जस‚ अन्तिले बाःचस - बेड़ा बरओ होले तेंग्गोन। एन्ने मनतेम बेड़ा कट्टा हेल्लरा।              

अन्तिले उन्दुल कातिक चन्द्दो ही अमास उल्ला झुबलु जों:ख़स पद्दियारिन आनियस का ओरमर अड्डो-मेक्खो ही गोंयसाली नु बिल्ली दगनर नेकआ अरा नन्ना उल्ला उरमी ओये-अड्डोन ख़ाड़-पोखारी नु एमेत’अर की एड़पा ओन्दोरनर नेकआ दरा तमहँय ओनना-मोःख़ना बेसे अबड़ा गुट्ठी गे हूँ बीःतअर चिअ़नर नेकआ। अन्तिले ओरमर कातिक अमास उल्लाड़ माःख़ा बीरी झुबलू जों:ख़स ही आइनका बेसेम नंज्जर दरा पईरी चोअर की तंगआ-तंगआ नलख नु लग्गियर केरर। चेंड़ा जों:ख़स अड्डो-मेक्खोन टोंक्का तरा होच्चर। इजगो झुबलू जों:ख़स हूँ पच्चो गही गोंयसली ती अड्डो-मेक्खोन टोंक्का तरा होच्चस। इजगो पच्चोे तंगहय गोंयसाली एड़पन सफा नना केरा ख़ने ईरी का आ अंड़ि‍या अडडो गही ओक्कचना तरता गोबारी सोना–रूपा उलटारकी र’ई। अबड़ा कत्थन तेंग्गाो गे पच्चोू‚ जोंखस गही एडपा किर्रनन असरा ईरी पहें आस मल किर्रयस। बअ़नर लोहाड़ी गूटी नू ओरमर तंगआ–तंगआ अडडो मेक्खो न खाड़ नू एमता:चर दरा बखडे ता उरमी अडडो–मेक्खोग संग्गेह अंडिया अड्डोन गने एड़पा किर्रयर। झुबलू जों:ख़स ही एड़पा मल किरर्ना चड्डे बेद्द ईरया पहें बेद्दा पोल्ला । आ झुबलू जों:ख़स एकसन केरस का एकसन छन्द मंज्जस का एन्देर मंज्जस अदिन ने हूं तेंग्गा पोल्लर। आस गही अंड़िया अड्उो गा बखड़े ता उरमी अड्डो-मेक्खो गने एड़पा किर्रया‚ पहें आ झुबलु जों:ख़स एकसन केरस अदी गही ठेकान मल चल्लरा।

इबड़ा कत्थन मेनर पददा ता मुदधआलर पच्चो गुसन अँड़िसयर दरा उरमी कत्थन तरकूटी ती मेंज्जे–नक्ख रर। बखड़े ता आःलर गही कत्थन मेनर पच्चो बाच ख़च्चिया - एन्ने गा मन्नम रहचा‚ इन्ना मनन का नेःला। धरमेस गही धरमी सवंगन‚ ने अख़ओ ! एका रूःपे नु एका गुसन बरओ‚ का एका गुसन लय मनो ! एंगहय भभना नु गा रहचा दिम - का आ जों:ख़स रित्ता आलस मईलदस। मना ओंग्गो का आद देव सवंग तली ! इबड़ा कत्थन मेनर मुद्धा आलर पच्चोन पच्चोन धिरजा चिच्चस - नीन धईन रअ़दी‚ धरमे अरा धरमी सवंग निंगहय संग्गे रहचा मुन्दा नाःम ईरनुम हुँ एःरा पोलकत। अक्कु नमहँय ससईत बोंग्गो। नमन आस गही तिंग्गका बेसेम ननना मनो। बअ़नर - मया ननु धरमे अरा दव ननु धरमी सवंग एका गुसन मदईत ननो‚ का एका गुसन डहरे एःदओ‚ अदिन ने हरा हूं बआ पुल्ली। अवगेंम मया ननु देव सवंग ती मयहादेव बअ़नु-बअ़नुम मय्हदेव बातार’ई। दव ननु सवंग दिम देव सवंग बातार’ई।

अन्ने मंज्जका ख़ोःख़ा केरमे-केरमे राःजी किर्रा हेल्लरा। चेंप-झड़ी बेड़ा सिरे बरआ हेल्लरा। ओःये ही दुदही मना हेल्लरा’ अड्डो-मेक्खो बढरआ हेल्लरा। ख़द्दमाःख़ो आःलिर गही दुदही हुँ नीं:दा हेल्लरा अरा ख़द्दर दव कुना परदा हेल्लरर। ईं लेखे राःजी किर्रया अरा आःलर दव कुना उज्जा-बिज्जा हेल्लरर। आ बेड़ा तिम कुँडुख़र‚ राःजी सोहान मनना परब मनाबअ़ना बअ़ते-बअ़ते‚ सोहान मनना ती सोहरई परब बआ हेल्लरर अरा आ बेड़न अरा आ बेड़ा नु आःलर अरा अड्डो-मेक्खो ही संग्गेम बछरना-बछाबअ़नन ईयाइद नननुम कातिक चन्ददो ही अमास उल्ला माःख़ा बाःरी गोंयसली नु बिल्ली दगनर अरा नन्ना उल्ला अड्डो-मेक्खोन एमताअ़नर सिंगराअ़नर दरा तमहँय ओनना-मोःख़नन बी:तनर मोख़ताअ़नर। एड़पा नु धरमे‚ धरमी सवंग अरा पचबल पुरखा रिन गोहरारनर दरा एड़पा खाप ता उरमी आल-आःलो गही सलसंत अरा कोड़े रआ गे ओहरा-जोहरा नननर। अन्ने चाःलो दिम अक्कु राःजी सोहान मनना परब ती सोहरई परब बातारनुम बरचा दरा अन्ने लेखेम ननताःरआ लगी। कुँड़ुख़ कत्था हूं आल जईत अरा आःलो जईत नुम ख़ोंड़ोरकी बि’ई। कुँड़ुख़ कछनखरना नु आलर मझी मेःत अरा मुक्का मेद मनी मुन्दा आःलो नु मेःत अरा मुक्का मेद मल मनी। आःलोन निसठा आःलो मेःद बेसे कछनखरना मनी‚ एकदद मुक्क मेद बेसे कछनखतार’ई।

(ख़ो:जुस - सय डा. नारायण उराँव, सैन्दा, सिसर्इ, जिला : गुमला)
Sections