कुँड़ुख़ पहटा नू पच्चो करम जेट्ठे चन्ददो नू मनी। एका-एका पद्दा नू र्इ करमन रो:गे करम हूँ बअ़नर। परब गही ना:मे लेखआ पच्चो करम नू पच्चो-पचगिर भर्इर करम उबुसनर। र्इ परब नू भादो चन्ददो ता रा:जी करम मलता डिण्डा करम बेसे पेल्लर-जों:ख़र मल उबुसनर। र्इ परब नू बेंजेरका बिटी बगारिन हूँ पा:ही मल एड़तार’र्इ। अवंगे सोग्गे ती बेंजेरका बिटी बगर डण्डी पार्इड़का रअ़नर - ओर - पच्चो-पचगिर करम मनाबा:चय, बरके बिटी से मला बा:चय, रे ॥ फेर - ओन्द ख़े:ता झरा, ओन्द खँड़ा धुथू गे, बरके बिटी से मल बा:चय, रे ॥ अक्कुन ता बेड़ा नू हूँ पच्चो करम गुमला जिला पहटा ही खोरा-बसुवा, सिसर्इ-भरनो अबड़ा गने मर्इन सिरे मनाबअ़नर। मना उंग्गी का नन्ना पहटा नू र्इन्दिर’र्इम नन्ना ना:मे ती परब मनाबअ़नर ह’अन, पहेंस नेगचार ओन्द मदहेम मनी। पुरखर र्इ परब गे बन्डा जेट्ठे चन्ददो ख़ो:ख़ा ता बेड़न चज्जियर। पच्चो करम उल्ला पच्चोर करम उबुसनर अरा ख़ाड़-पोखारी नू एमनर की एड़पा बरनर, अन्तिले एड़पन गोबारी ती ए:गनर। एड़पन ए:गा गे एड़पा ता मुक्कर अरा पेल्लर हूँ संगरा चिअ़नर। अदी ख़ो:ख़ा र्इ:गका लूड़न चा:ली नू ओन्द कों:ड़ा नू उर्इय्यर की एड़पा उला धूप-धूवन नननर। कुकचप्पो बेड़ा कट्टिका ती पच्चोर एड़पा ता लूड़ा-भँड़न अरा धूप-धूवन गने पद्दा ता अखड़ा नू ओन्दोरनर। अजगो पचगिर करम डा:ड़ा खण्डर की अखड़ा ओन्दोरनर। आ करम डा:ड़न नैगस अखड़ा मझी गड़दस। असन करम गड़चका हेद्देम ओरमर एड़पा ती ओन्दोरका लूड़ा-भँड़न चउगुड़दी उर्इनर। अन्तिले पच्चो-पचगिर चुल्हा ओदना बेड़ा गूटी बे:चनर तसले करम बोहाबआ गे लूडा़-भँड़ा संग्गेम उरमिन नलते-बे:चते पद्दा सियाँ आ पक्खे कट्टताअ़नर चिअ़नर। र्इ करमन अम्म नू मल बोहाबअ़नर। र्इदिन ख़र्इका ख़े:ख़ेल नू सीमान आ पक्खे नननर। रा:जी करम ता करमन सियाँ पक्खे मल नननर। अदिन पद्दा सिमान ता तूसा-पोखारी महले ख़ाड़ नू बोहाबअ़नर। किर्रो बा:री नोढ़ोरनर-मूझुरनर दरा बे:चनूम नैयगस ही चा:ली नू जोक्क गहड़ी बे:चर तंगआ एड़पा किर्रनर का:नर। बअ़नर, र्इ करमन बोहाबआ गे मुक्कर धरअर की मल होअ़नर। पच्चो करम नू पच्चो-पचगिर एन्ने डण्डी पाड़नर - ओर - साल भर्इर नू पच्चो करम बरचा, बड़ा ही धुकड़ी धुथू , रे ॥ फेर - पेल्लो करम नू छिरका रे बर्इरका, पच्चो करम धुकड़ी धुथू , रे ॥ पच्चो करम बर्इसाक पुनर्इ उल्ला तिम ओ:रे मनी का:ली। अन्ने गा बा:तार’र्इ का परब-तिहर, ने:गचार, उरमी बिल्ली पक्ख नू मनी पहें एन्देर अख़ओय एका-एका अड्डा नू उ:ख़ा पक्ख नू हूँ परब मनी। गुमला जिला ता खोरा-बसुवा पद्दा नू बर्इसाक पुनर्इ उल्ला पच्चो करम मनाबअ़नर। अदी ख़ो:ख़ा पच्चो करम बा:सी उल्ला ख़द्दी अरा जेट्ठे जतरा मनी। मन उंग्गी आ पद्दा नू इन्दिर’र्इम अकलक मंज्जा ह’अन। इबड़न गा आ पद्दा ता पच्चो-पचगिर अख़ओर। र्इ लेखेम सिसर्इ थाना ता सैन्दा, बघड़ी, सियांग, पंडरानी पद्दा अबड़ा गने बन्डा जेट्ठे ख़ो:ख़ा पचगी मंग्गर गे पच्चो करम ही उल्ला टिपतार’र्इ। पच्चो करम पर्इत्त नू बअ़नर का - हुल्लो परिया नू बरख़ा खतरते-खतरते किसिम-किसिम ही रो:गे-बलय बरआ लगिया। अकय बग्गे आ:लर खेआ का:ला लगियर। जिया जउंत हूँ खेआ का:ला लगिया। आ:लर किसिम-किसिम ही मंदर-बिरो नंज्ज र्इ:रयर पहें रो:गे मल बोंग्गा लगिया। होरमर अकलक ख़ेअना ती र्इलिचयर केरर दरा बरना चान नू एकासे बरख़ा अँड़सा हेल्लरा अन्नेम आ:लर घोघआ हेल्लरर का एकासे रो:गे ती बच्छरना मनो। पद्दा नू संगोठ मनर की रो:गे ती बच्छरना गहि निसाब गे पचार्इती नंज्जर, पहें इन्दिर’र्इम उरजिस ओथोरआ पोल्लर। अन्तिले पद्दा ता रो:गे-बलयन पद्दा सिमान पार नना खतरी रोजोट नंज्जर दरा पद्दा ता देव अरा दिबीन गोहरारआ हेल्लरर। एन्ने बेड़ा नुम ओंगहोन अड्डो ख़ा:पू पच्चो-पचगिर ही नत्तीस अरा नतिया गने तमहँय अड्डो-मेक्खोन भरे लोहाड़ी बेड़ा नू अम्म ओनतअर की एड़पा ओन्दोरआ लगियर। आ बा:रीम एका तरती ओन्टे लकड़ा बरचा दरा नत्तीस अरा नतिया बगा रिन नेप्पर की बोंगतआ बिद्दया, पहें अम्म-झरिया गुसता करम झुण्डू ती उरूख़का बर्इरबण्डों नु बज्झरा दरा एँ:ड़ो ख़द्दारिन अम्मबर बोंग्गा केरा। अबड़ा पच्चो-पचगिर एड़पा बरअर ओरमा पद्दियारिन तिंग्गयर। ओरमा पद्दियर गुजाप नंज्जर दरा इंज्जरर का आ अकलक, धरमे अरा धरमी सवंग गही रो:गे-बलय ती बछरआ दरा आल उज्जना ही डहरे तेंग्गना तली। अउलम पद्दियर गच्छरर का बन्डा जेट्ठे ख़ो:ख़ा पचगी मंग्गर उल्ला आ अम्म-झरिया गुसता करम डा:ड़न ओन्दोरअर अखड़ा नू गड़आ लग्गो दरा पद्दा ता उरमी एड़पा-पल्लिन ए:गर, धूप-घ्ाूवन ननर करम संग्गे पद्दा सियां कट्टतअ़ना मनो। अन्तिले बरना पचगी मंग्गर उल्ला पच्चो-पचगिर करम उबुसयर दरा इंजिरका बेसेम करमन अखड़ा नू गड़चर दरा एड़पन र्इ:गका लूड़ा-भँड़न बी:ड़ी पुत्तना गे पद्दा गही सिंया ती कट्टताचर चिच्चर। बअ़नर - अन्ने नंज्जका ख़ो:ख़ा अकय चान गूटी आलर दव कुना सलसंत लेकन रआ हेल्लरर। एन्ने करम मना बअ़ना पद्दा नू रो:गे खेदना बेसे ओन्टे पद्दा ती नन्ना पद्दा सिमान कट्टते गोट्टे कुँड़ूख़ पहटा नू छाहचा केरा दरा र्इन्ना गूटी पच्चो करम मलता रोगे करम मनाबअ़नुम बरतारआ लगी। बअ़नर, र्इ परबन रो:गे करम बा:रका ती करम गुसन ओत्था ए:ख़ आ:ली बगर अरा डिण्डा कुकोय गुट्ठियर मल ओं:सोरनर। अखड़ा नू करम गड़अर नैगस धरमे अरा धरमी सवंगन गोहरारदस - ए दे धरमे, निंगहय अख़ना, एमहँय बलना, ए:म किय्या, नीन मय्याँ, नीन उरमिन ए:रा लगदय। अख़आ-बल्ला सुमरारआ-गोहरारआ लगदम - एमहँय पद्दा सिमान नू मलदव ता:का-पुली, रो:गे-बलयन अमके कोरआ चिआ दरा दव चेंप-झड़ीन तर्इके। एकन्नु का एमहँय पद्दा-सिमान ता आल-आ:लो, मन्न-मांस, उरमी जिया-जउंत द:व कुना रअन नेकअन अरा बरना चान गे अउर ओंगहोन निंगहय ना:मे ती सुमरारआ-गोहरारआ ओंगदम नेकआ। पद्दा नू बेड़ा सिरे कयनो किसिम गही रो:गे बर’र्इ। देा-दुनियाँ गही खभर्इर तिंग्गी का 1817-1824 गूटी नू नमहँय देा नु 10 लाख ती बग्गे आ:लर हैजा ती केच्चर। आ लेखे ओबा (महामारी) नू नमहँय पुरखर नमन बछाबा:चका रअ़नर। मना उंग्गी का हैजा रो:गे ती बछाबआ गे पुरखर ही बरजाचका र’र्इ का, हरयनी पुजा ती डिण्डा करम गूटी नन्ना पद्दा पा:ही मल्ला का:ना। इदी गही मने मनी का चेंप खतरका ती अम्म ती बींड़िरना रो:गे ती बछरआ गे नन्नर गही एड़पा ओना-मो:ख़ा गे मल्ला का:ना। डिण्डा करम गूटी नू ख़ाड़-ख़ोसरा अरा ख़ल्ल ता अम्म फरीच मनी का:ली। इदी संग्गेम अम्म ती बींड़िरना रो:गे ती बछरआ गे नमहँय पुरखर ओन्टे ढचर ओत्थरर। आ ढचर नू मण्डी बिच्चका दरा अमड़ी पी:सका ख़ो:ख़ा भर्इर कट्टू अम्म सजआ लगियर। आ अम्म ती रो:गे ननतु’उ जिनिस कुट्टका मण्डी गने संग्गे मनतेम खेआ का:ला लगिया। अन्तिले आ मण्डी अम्म, नू बे:क सज्जका ती जियन बछाब’उ पना (जीवन रक्षक घोल) मना का:ला लगिया। एन्ने ननर की पुरखर नमन अवन्दा ससर्इत ती बछाबाचर। एन्नेम मता-मांय (स्मॉल पॉक्स) ओन्द मदहे ही वायरस ती मंज्जका रो:गे तली अरा इदी गही दवर्इ मल्ला। इदि ती बछरआ गे वैक्सीन होअ़ना मना लगिया, पहें अक्कु र्इ रो:गे उभड़ा:रा केरा। अन्नेम र्इनल्ता कोरोना कॉविड 19 रो:गे गही बिक्ख र्इत्त’उ बिरो मल्ला तेयार मंज्जका। अवंगेम सरकार कोरोना लॉकडाउन अरा आलारिन गेच्छा उर्इय्यर की रो:गे ती बछरआ गे बअ़र्इ। र्इ लेखे बअ़ना चही का, पच्चो करम, आल उज्जना नू धरमे अरा धरमी सवंगन र्इयाइद ननना दरा अनआ-मनआ रो:गे-बलय ती बछरआ गे डहरे पंग्गे ननना ही उरजिस तली।
(ख़ो:जूस : सय भुवनेश्वर उराँव, तिलसिरी टटख़ा टोला, थाना : घाघरा, जिला : गुमला)