बअ़नर - हुल्लो परिया नु ओरोत कुँड़ुख़ बे:लस ही रा:जी नु ओंगओल अनभनियाँ रा:जी कीड़ा मंज्जा। चेंप-झड़ी मल पुर्इंका ती खितीपुती मल मना लगिया। तूसा-झरिया, खाड़-ख़ोसरा, कूबी-पोखारी उरमी ख़ाया लगिया। मन्न-मास ही खं़जपा हूँ नठारआ हेल्लरा। ओना-मोख़ा गे मल ख़खरना ती टोड़ंग-परता ता अड़ख़ा-चे:खे़ल अरा बोकला गुट्ठीन मो:ख़र, आलर एकअम बेसे उल्ला खेपआ लगियर। चान-चान, चेंप-झड़ी मल मना लगिया। एन्ने नु कुँड़ुख़ बे:लस गे रा:जी चलाबअ्ना अफर्इत मंज्जा केरा। बे:लस ही ख़द्द-ख़र्रा मल रहचका चड्डे आस हेन्दवारकम रआ लगियस पँहेस रा:जी की:ड़ा बे:लासिन अउर बग्गे दुक्खे चिच्चा। बे:लस, बखड़े नु अख़आ-बल्ला उरमी मधे ही बर्इध-मती, ओहरा-बिनती अरा पुजा-धजा ननताच र्इरयर, पँहेस चें:प मल पोस्सा अरा ख़द्द ख़र्रर हुँ मल मंज्जर। एन्नेम नननुम उल्ला कट्टनुम का लगिया। उन्दुल बे:लस, बेलख़ा ता आ:लर ही ससर्इत अरा दुक्खेन ए:रर सोग्गे ती तंगहय बखड़े छमहे ता ख़ाड़ गण्डा गुसता करम मन्न ए:ख़ नु ओक्कर बेलख़ा अरा ख़द्द-ख़र्रा ही चिता-बुता नननुम ख़न्न ए:ख़ा लगियस। आ बारीम करम मन्न गुसन ओन्टे अनबूझ ले कत्था (अलौकिक घटना) मंज्जा। करम मन्न, ठनका खतरना बेसे जिरजोर ले बिलिचया अरा चाल खक्खरा - ‘‘अम्बा सोग्गे मना बे:लायो अरा डिड्ढ नना। अक्कु निंगहय करम-कपड़े किर्रो।‘‘ एन्ने बअ्नुम ओरोत अनथन दव आलस (देव आ:लो) ही छाव नु ओन्टे पचगीस बरचस अरा बे:लस सिन आनियस -‘‘र्इ करम मन्न ही मून्द गोटंग डा:ड़न होअ्के दरा बखड़े मझी नु गड़अर की पुजा-धजा ननके दरा नन्ना उल्ला ख़ाड़ नु बोहा बअ्के। एन्ने ननोर होले निमहँय बेलख़ा नु चेंप-झड़ी बरओ, खिती-पुती मनो, बेलख़ा-रा:जी की:ड़ा ती परपन्द मनो अरा ओरमर ही ख़द्द-ख़र्रा कोड़े रओर दरा निमहँय करम-कपडे़ किर्रो।‘‘ एन्ने बअर आ पचगिस असते की छन्द मंज्जस केरस।
करम रा:गे नु डण्डी पाड़नर -
करम-करम बाचकी पेलो कोय ॥ करम ि नंगहय चा:ली नु बरचा, रे ॥ असार, सावन खरा दुलार केरा ॥ भादो नु करम निंगहय बरचा, रे ॥
जोक्क गहड़ी हया-दंदा मंज्जका ख़ो:ख़ा, बे:लस बखड़े किर्रयस दरा ओरमर गने गुजाप नंज्जस अरा आ अनथन दव पचगिस गहि कत्था आइनका बेसेम नना गे टीप उर्इता:चस अरा बेलख़ा नु डहुड़ा कुद्दतारा दरा टीप धरचका उल्ला ओरमर उबसियर की पुतबीरी आ करम मन्न गही मून्द गोटंग डा:ड़न मइन ती ओन्दरर की बखड़े मझी गड़अर पुजा-धजा नंज्जर अरा रिज्झ ती बे:चा ओ:रे नंज्जर। बअ़नर पुजा-नेग मुंजुरते-मुंजुरतेम घटा-घ्ाुमर्इर बदाली बरचा दरा मुसुरकुट चेंप पोस्सा। आ:लर रिज्झ ती अनभनियाँ बिच्चयर अरा नन्ना उल्ला पइरी निन्दका ख़ाड़ नु करम डाड़न बोहाबा:चर। केरमे-केरमे रा:जी किर्रया अरा आ कुँड़ुख़ बे:लस ही बेलख़ा दव कुना चलरआ हेल्लरा। अउलता करम, बे:ल ख़ोता ता करम बअ़नुम रा:जी करम बाता:रा। करम पुजा-पाट मंज्जका ओन्द चान ख़ो:ख़ा करम उल्ला बे:लस ही एँड़ झना कुक्को ख़द्द (जुड़वां) ख़द्द मंज्जर। बे:लस, कोंहस ही ना:मे करमा आस ती सन्नीस गे ना:मे धरमा उर्इयस। एन्नेम रा:जी चलरनुम केरा, बेड़ा कट्टनु केरा, आ:लर बढ़रतेम केरर अरा रा:जी करम मन्नुम केरा। बेड़ा सिरे बे:लस ही अउरेम ख़द्दर मंज्जर। र्इ करमा-धरमा गर साय भर्इयो अरा ओन्द गहीन मंज्जर। करम गड़ना ओरे मनना उल्ला भादो चन्द्दो ही दोय ओन्दता उल्ला रहचा केन्धेल। अउलता उल्लानुम पुरखर गही तिंग्गका बेसेम रा:जी करम मना बअ़नुम बरतारआ लगी।
बअ़नर - आ बेल बखड़े ता करमा-धरमस तमहय सन्नी भर्इयो अरा तमहय सन्नी बहीन गने दव कुना परदा हेल्लरर। तंगड़ी ओरमर ती सन्नी रहचा अरा तंग नानी गने पायसरी ननो बारी मिता मंज्जकी रहचा। अवंगे अदिन मया ती जऊनी नानी हूँ बअ़आ लगियर। बेड़ा सिरे ओरमा भर्इयोर गही बेंज्जा मंज्जका ख़ो:ख़ा एड़पा नु सये भइय्योर गही सये झना मुक्का बगर अरा ओरोत तंगड़ी, दव कुना रअ़आ हेल्लरर। तंगड़ी गही बेंज्जा अवंदा गूटी मल मंज्जकी रहचा। अयंग-बंग मुंजुरका ख़ो:ख़ा कोंहा भर्इ्यो करमस एड़पा चलाबअ़ा लगियस। आस ओरमा भर्इयोर गही मदर्इत ती एड़पन दव कुना चलबअ़आ लगियस। करमा-धरमा बगर ही परिदका ती ओंगओल अनभनियाँ रा:जी कीड़ा मंज्जा। चेंप-झडी अकय चान ती दव कुना मल पुर्इंकी रहचा। रा:जी की:ड़ा तुरू आलर इलहो-बिलहो मना हेल्लरर। रा:जी की:ड़ा संग्गे रो:गे-बलय ती आ:लर छितिछान मना लगियर। अड्डो-मेक्खो, जिया-जंउत, मन्न-मास, उरमी गे अकय ससर्इत मना लगिया। ओरमर धरमे सिन गोहरारर, पूजा-धजा नंज्जर पंहेस एन्दरा हूं डहरे मल एत्थरा। पद्दा ता आ:लर नना-ओना गे अजगो-इजगो का:ला हेल्लरर। करमस गही एड़पा नु हूँ ख़ुरजी नट्ठरा केरा अरा कीड़ा सारतारआ हेल्लरा। एड़पा नु ख़ुरजी मलका अरा रो:गे-बलय, पद्दा-ख़ेप्पा नु उज्जना मसकिल मना लगिया। एन्नेन ए:रर करमस तेलंगा (तुड़ुख़) राजी, मलंग लदआ का:ला गे सपड़ारस। एड़पा नु गुजाप मंज्जा का ने-ने एड़पा नु रअ़ओर अरा ने-ने मलंग लदआ का:लोर? कोंहा भर्इयोसिन एड़पा ती बहरी का:नन मेनर तंगड़ी गे अकय सोग्गे लग्गिया अरा आद हूँ तंग ददस गने मलंग लदआ काला गे सपड़ा:रआ हेल्लरा। कोंहा भइर्इयोस तंगड़िन बरजाचस अरा धिरजा चिच्चस का -‘‘चेंप खतरआ-खतरआ गे ओरमा भइर्इयो बगर जुनजुना एड़पा किर्रोर। एन्ने गछरका ख़ो:ख़ा, भर्इयो बगर तमहँय आ:ली बगारिन, जऊनिन ए:रा गे जिमा चिच्चर दरा मलंग लदआ गे एड़पा ती उरखर। डहरे ए:कते-ए:कते आर गे पइरी ती लोहाड़ी अरा लोहाड़ी ती संधी मना हेल्लरा। लोहाड़ी अरा ख़ुड़ती ओना गे एड़पा ती होच्चका अड़खा-चे:खेल अरा अलख़ड़न मो:ख़ना दरा झरिया ता अम्म ओनर उल्ला खेपआ हेल्लरर। एन्नेम कालते-कालते आर ढेर गेच्छा रा:जी उरखर केरर, अन्तिले उन्दुल पुतबारी गुजाप नंज्जर का - नाम अक्कु सयो भर्इयोत सयो कों:ड़ा तरा मलंग लदआ गे का:लोत तसले चेंप खतरका ती इसता परता करगा हेद्दे जुमुरओत अरा एड़पा किर्रोत। एन्ने भंगरारका ख़ो:ख़ा ओरमा भर्इयोर तंगआ-तंगआ फरियाचका डहरे तरा उरखर।
बेड़ा सिरे ओरमर तमहँय नलख नु लइक्का रहचर। कोंहा भर्इयो करमस चन्दवा कंक (चंदन लकड़ी) गही चन्दवा कमना नु पंखराज रहचस। अवंगे आस गही खुरजी उल्ला गइनका बढ़रआ हेल्लरा। बग्गे खुरजी अरजाअ़ना चिता नु ओरमा भर्इयोर एड़पा किर्रनन मोधरर केरर। चेंप खत्तरा, ख़ाड़-ख़ोसरा निन्दया बइत्ताया, पंहेस सयो भर्इयोर गे होस मल बरचा का आरिन चाँड़े एड़पा किर्रना रअ़र्इ। इजगो एड़पा नु तंगड़ी अरा सयो गुतनीर हया-दंदा मना हेल्लरर का सयो भर्इयोर एन्देर गे एड़पा मल किर्रा लगनर? जऊनी भभनाचा - ददा बगर गा गछरका रहचर का चें:प ख़तरका ती एड़पा किरा गे, पंहेंस अक्कु गूठी मल किर्रा लगनर। डहरे बाट नु इन्दिरर्इम अल्हन मंज्जा का एन्देर ! का खाड़ बोहाबा:चा ! का लकड़ा मेढ़ो होच्चा ! जे इवन्दा उल्ला नु हूँ एंग ददा बगर मल किर्रा लगनर। एन्ने घोखअर आद मुरूख चींखी। अदिन ए:रर तंग नासगो बगर हूँ एलचा हेल्लर का मा:नीम एन्दिर्इम अलहन मंज्जा होले अफाइत मनो कालो। जऊनी तंग भर्इयो बगर गही सोग्गो ती अम्म मण्डिन अम्बिया चिच्चा। अदिन ए:रर सयो गुतनिर गे मसकिल मंज्जा केरा का जऊनी इन्दिरर्इम मंज्जा होले आर जऊनी तंग भर्इयो बगर हेद्दे एका बेसे मूँही ए:दओर। एन्ने-एन्ने नुम असारी चन्दो कट्टिया तसले सावन चन्दो हूँ कट्टा लगिया। इजगो जऊनी उल्ला माख़ा धरमेस ती गोहरारआ लगिया का -‘‘अना धरमे, एंगहय ओरमा कोंहा ददा बगारिन कोड़े-कोड़ेम एड़पा तर्इया चिअ़आ, मला होले ए:न एका बेसे रओन।‘‘ जऊनी गही गोहरारन धरमेस मेंज्जस केन्धल, का अन्ति धरमेस गही छया-भया नंज्जका अन्ति। जऊनी, उन्दुल अड़ती बा:री पद्दा छमहे ता ख़ाड़ गण्डा गुसता करम मन्न ए:ख़ नु ओक्कर तंग भर्इयो बगर गही सोग्गे ती चीं:ख़ा-ओलख़ा लगिया। आ बारीम करम मन्न ती ओन्टे अनबूझ ले कत्था मंज्जा। करम मन्न ठनका खतरना बेसे बिलिचया दरा चाल ख़क्खरा - ‘‘अम्बय चींख़य बिटी, डिड्ढ उर्इयय। निंग भर्इयो बगर चाँ:ड़ेम किर्रोर। ‘‘एन्ने बअ़नुम ओरोत पचगी आलस ही छाव नु ओरतोस बरचस अरा जऊनीन धिरजा चिच्यस। अदि ख़ो:ख़ा जऊनिन आनियस - र्इ मन्न ढुढरी ता बिहनिन हो’अय दरा कलय बिटी, र्इ बिहनिन बउगी नु र्इदके दरा एड़पा उला उइके अरा सायता उल्ला करम उबसअर की पूजा-धजा ननके। पूजा नु र्इ बिरही पूँपन अरगाअ़के दरा नना उल्ला ख़ाड़ नु बोहा बअ़के। एन्ने ननोय होले, निंग भर्इयोर गही मूँहीन नीन चाँड़े ए:रा ओंग्गोय।‘‘ अन्तिले आ पचगिस असते छन्द मंज्जस केरस। अदी ख़ो:ख़ा आस गही कत्था आइनका लेखेम नना गे बिहनिन होअर एड़पा किर्रया दरा उरमी कत्थन तंग नासगो बगारिन तिंग्गया चिच्चा। कत्थन मेनर सयो गुतनिर, जऊनिन हियाव चिच्चर अरा आ अनथन दव पचगिस गही तिंग्गका बेसे नन्तआ ओरे नंज्जर।
अन्तिले बिहनिद इदतारा दरा एड़पा उला उइतारा। इदी ख़ोख़ा ओरमर तंग जादा गने सायता उल्लन असपँयड़ा ए:रा हेल्लरर। इजगो धरमेस गही दोवा तुरू सयो भर्इयोर गे लूर किर्रा हेल्लरा - का आरिन चाँड़े एड़पा किर्रना रअ़र्इं। अन्तिले आर चाँड़े-चाँड़े तमहँय ढिबा खुरजिन मुसिगयर अरा खडु़ अड्डो नु लदचर की गछरका अड्डा गुसन जुम्मरर की एड़पा किर्रा हेल्लरर। करमस ओरमर ती बरगे ढिबा अरजाचका रहचस अरा ढिबा गही दप्प तुरू जहड़ी आल मंज्जका रहचस। आस तंग भर्इयो बगारिन हूँ मल बदआ हेल्लरस। र्इ लेखे ओक्कते-इजते आर पद्दा गुसता ख़ाड़ गण्डा गुसन अँड़िसयर। असन अँड़सर की करमस तरनारनुम ओरमर ती सन्नी भर्इयोसिन आनियस की एड़पा तर्इयस - ‘‘कला हो निंग नासगो बगारिन बअ़के का - ददा बगर ढेर बग्गे ढिबा-खुरजी अरजा:चर की बरआ लगनर, से आ:रिन ख़ाड़ गण्डा गुसन परिछआ गे गुचा।‘‘ इजगो जऊनी अरा तंग ना:सगो बगर सायता उल्ला करम उबसियर अरा करम पुजा नंज्जर दरा रिज्झ ती नला तो:का हेल्लर। जऊनी आ पूंपन ओरमर गे ख़ट्टिया अरा ओरमर अदिन मइन ती झोकचर अरा मे:झरर। एकदद जौ अरा जऊनी ही चिच्चका पूँप ती जवा पूँप‘‘ बाता:रा। आ बा:रीम सन्नी भर्इयोस एड़पा अँड़िसयस। भर्इयो बगर गही पद्दा अँड़िसकन अख़अर ओरमर रिज्झ ती रितयारर केरर। सन्नी भर्इयोस हूँ तंगड़ी गही चिच्चका पूँपन मया ती झोकचस दरा रिज्झ ती बेचा हेल्लरस दरा तंग ददस गही अइनकन तेंग्गा गे मो:धरस केरस। सन्नी भर्इयो सिन मल बरना ए:रर सोयता, पानता, नाख़ता अरा मून्दता भर्इयो बगर पा:ली-पा:ली एड़पा बरचर पँहेस ओरमर रिज्झ ती उंक्ख़यर केरर। इदी ख़ो:ख़ा करमस किबिरनुम तंग आली बगारिन मे:ख़ा गे धरमासिन धिराबअनुम तर्इयस। मुन्दा आस हूँ एड़पां अँड़सर की मो:धरस केरस। आस तंगड़ी गही चिच्चका पूँपन दव कुना झोकचस अरा संगे-संगे बे:चा हेल्लरस। मुंज्जा नु ने:कन हूँ मल किर्रना ए:रर करमस ता:निम केबेरते एड़पा अँड़िसयस। खने ए:रदस का ओरमर पद्दा बखड़े नु करम गही चऊगुड़दी उधमध बेच्चा लगनर। कोंहा भर्इयोसिन ए:रर जऊनी बोंगते केरा, ओ’लग्गिया अरा जवा पूँप चिच्चा। पंहेस ढिबा गही दप्प ती उमतारका करमस तंगड़ी गही खेक्खा ता पूँपन थपड़ाचस की हिबिड़यस अरा कैर ती करम डा:ड़न चड्डस दरा गेच्छम हिबिड़यस चिच्यस। अदि ख़ो:ख़ा धर्मेस गही छया-भया का अन्ती एन्देर! - ओरमर करमस गने खाड़ गण्डा गुसन केरर ख़ने ए:रनर का - करमस ही ढिबा-ख़ुरजी लदचका खडु अड्डो गुट्ठिन बजर लवचकी रअ़र्इ अरा उरमी ढिबा चिन्द मंज्जकी रअ़र्इ। अबड़न ए:रर करमस हया-दन्दा मननुम चींख़ा-ओलख़ा हेल्लरस। इदी ख़ो:ख़ा करमस एड़पा किर्रयस अरा हिबिड़का करम डा:ड़न बिद्द र्इरयस। पहें आ करम डा:ड़ा नीं:दका ख़ा:ड़ नु खत्तरा दरा टोपोल-टोपोल मन्नुम किय्या तरा चला केरा। अन्तिले करमस, तंगहय करम-कपड़े ख़ोटोरका संग्गे एकअम बेसे ओक्का-इजआ हेल्लरस पहें अउला तिम आस गही उरमी नलख़ मलदव मना हेल्लरा। आस कत्था-कत्था नुम खिझरारआ अरा कैरारआ हेल्लरस। अन्ने-अन्ने नुम ओरमा भर्इयोर जुदा मंज्जर केरर। करमस उल्ला गइनका ख़ुरजी मलका अरा पयाहा मना हेल्लरस। ओन्द चान ख़ो:ख़ा उन्दुल सन्नी भर्इयो धरमस गही रोवा (रोपा) इदना ही बेड़ा बरचा। ओरमा भर्इयोर रोवा मदर्इत केरर अरा एड़पा किर्रर की मदर्इत ओण्डर-मोक्खर, पँहेस करमस मदर्इत ओना मल केरस। करमा तंग आली रोवा इदआ केरा तसले किर्रया की मदर्इत मण्डी ओण्डा तेकर एड़पा किर्रया। करमस जहड़ी जिया ती मण्डी मल ओण्डस दरा नी:दी कूल रर्इह केरस। मा:ख़ा बा:री कूल कीड़ा तुरू करमस अऊरिम ख़िंसारदस अरा हिसिंगा-पटंगा मनदस, अन्तिले कैरारनुम रोवा ख़ल्ल केरस की तंग आली गही इद्दका रोवन चड़आ-चड़आ हेबड़ा हेल्लरस, मुन्दा धरमेस गही छया-भया, चड़रका रोवा तान-तानीम इदिरआ हेल्लरा। अदिन ए:रर कैरारनुम चाँड़े-चाँड़े चड़दस की हेबेड़दस पँहेस रोवा हूँ अदी ती बग्गे चाँ:ड़े इदिरनुम का:ली। अबड़न ए:रर इलिचयस की बोंग्गा हेल्लरस। आ बारीम ओन्टा सड़ा मेन्दरा अरा ओरोत अनथन दव पचगी आलस हेद्दे बरचस की बा:चस -‘‘निंगहय करम-कपड़े (किसमर्इत) ख़ोट्टरा हो करमा। नीन करम दे:वन रूसी नंज्जकय अरा चड्डकय की हिबिड़कय। अक्कु एका गूटी नीन करम दे:वन मल मनाबओय आ गूटी निंगहय करम-कपड़े मल किर्रों‘। एन्ने बअर आ देव पचगिस छन्द मंज्जस केरस। आ देव (दव ननु) पचगिस गही कत्थन मेनर करमस गे होस बरचा। आस पछतारआ हेल्लरस अरा करम दे:वन बेद्दागे उरखस? एड़पा ती उरूख़का ख़ो:ख़ा कूल-कीड़ा लइक्का ती एड़पा ती होच्चका अलख़ड़ा गुट्ठिन मो:ख़र दरा झरिया ता अम्मन ओनर मुन्दहारे का:ला हेल्लरस। एन्ने मननुम आस ढेर गेच्छा रा:जी उरखस केरस।
कालते-कालते करमस गे अकय कीड़ा लग्गिया। आस डहरे नु डोम्बारी पंज्जकन र्इरयस की मोख़ा गे मन्न मय्याँ अरिगयस पँहेस डोम्बारिन मोख़ा पोल्लस एन्देर गे का उरमी डोम्बारी नु पोचगो मंज्जकी रहचा। अदी ख़ो:ख़ा आस मुन्धभारे काला हेल्लरस। डहरे नु आस गे ओण्टा पोखारी ख़क्खरा। असन आस अम्म ओना केरस पँहेस अम्म ओना पोल्लस, एन्देरगे का अम्म ख़ें:सो मंज्जकी रहचा। असते की आस का:ला हेल्लरस। डहरे नु ओन्टे पलख़ंज्ज़ा इद’उस ख़क्खरस, पँहेस आस गुसन हूँ पलख़ंज्ज़ा मल ख़क्खरा, एन्देरगे का आस गही पलख़ंज्ज़ा नु पोका लग्गकी रहचा। असते की आस का:ला हेल्लरस। डहरे नु ओन्टे अलख़ड़ा बीसुस ख़क्खरस, पँहेस आस गुसन हूँ अलख़ड़ा मल ख़क्खरा, एन्देरगे का आस गही अलख़ड़ा मल चुंजुरआ लगिया। अन्तिले करमस असते की मुन्धभारे का:ला हेल्लरस। जोक्क गेच्छा केरका ख़ो:ख़ा डहरे नु ओरोत दुधी बीसुस ख़क्खरस, मुन्दा असन हँ दुधी मल ख़क्खरा, एन्देरगे का दुधी बीसुस गही ओये ही दूधी दिम ख़र्इया केरा। अन्तिले करमस असते की मुन्धभारे का:ला हेल्लरस। जोक्क गेच्छा केरका ख़ो:ख़ा डहरे नु ओण्टे बे:ल बखड़े ता बे:लस रो:गे ती लिटलिटा मंज्जका रहचस। आस गने कत्था मंज्जा ख़ने आ रो:गे सा:र’उस,बा:चस - नीन करम देवन ख़क्खोय होले एंगहय दुक्खेन हूँ मेनके। र्इ लेखे करमस कूल कीड़ा सा:रनुम असते की का:ला हेल्लरस। कालनुम-कालनुम आस ओन्टा कोंहा ले बियारख़ो हेद्दे अँड़िसयस। आ बियारख़ो मझी, ओन्टा करम मन्न एत्थरा पँहेस असन अँड़सना अकय मसकिल रहचा। असन आस कूल-की:ड़ा सा:रनुम मून्द उल्ला-मा:ख़ा रर्इह केरस, पंहेस आस गे एन्दरा हूं उपर्इ-पतर मल ख़क्खरा। आ बारीम बियारख़ो कूटी नु ओन्टा गो:दो बरचा अरा करमासिन मेंज्जा। आद आ:सिन मून्द उल्ला ती जों:हआ लगिया। अन्तिले अदि गे हूं मल सहारा ख़ने हेद्दे बरअर बा:चा - नीन इसन ने:कन बेद्दा लगदय। गो:दो गही कत्थन मेनर करमस बा:चस - करम दे:वन बेद्दा गे उरूख़का रअ्दन। ख़ने गो:दो बा:चा - करम दे:वन ख़क्खोय होले एंगहय दुक्खेन हूँ मेनके। ए:न कूल नुंजना ती दव कुना ओ:गा हूँ पोल्लेन। ‘‘एन्ने बअर गो:दो करमासिन घोड़ो अरगाचा की आ बियारख़ो मझी ता करम मन्न हेद्दे अँड़सताचा चिच्चा। करमस मन्न गुसन अँड़सर की ए:रदस का आ अनथन दव पचगिस मन्न गही मूली नु उक्का रअ़दस। आसीन ए:रर करमस बुज्झरस केरस अरा करम देव गही ख़ेड्ड नु ख़त्तरस की गोहरारआ हेल्लरस। करमस गही गोहरारना अरा ओहरा बिनती नन्नन ए:रर देव पचगिस बाचस -‘‘चोआ बबु, अक्कु निंगहय दुक्खे बोंग्गो अरा करम कपड़े किर्रो। ‘‘एन्ने दोवा ख़क्खर करमस चो:चस दरा आ देव पचगिसिन ओ’लग्गियस। अदि ख़ो:ख़ा डहरे ता उरमी कत्थन तरकूटी ती तिंग्गयस अरा अदिन बुझाबआ गे बा:चस। करमस गही कत्थन मेनर पचगी रूपे नु करम देव उरमी कत्था गही बेयानन तिंग्गया अरा बा:चा - एंगहय मून्द गोटंग डा:ड़न होआ दरा कला। आदिम निंगहय डहरेन पंग्गे ननो। एन्ने बअर आ देव पचगिस असते की छन्द मंज्जस केरस। अन्तिले करम देव ही दोवा ख़क्खर करमस नेमहाँ मनर बड़ियर मंज्जस केरस। अदी ख़ोख़ा आस मून्द गोटंग करम डा:ड़न ओन्दिम रज्झ नु खण्डर की धरचस की एड़पा कीर्रा हेल्लरस।
किर्रो बारी उरमी ती मून्ध, गो:दो ख़क्खरा अरा करमासिन ए:रर मेंज्जा। ख़ने करमस बा:चस - ‘‘नीन धरमेस गही ओहमा पा:ड़ूरिन ननअम ठकदी की मूख़दी अवंगे धरमेस निंग्गा दाँड़े चिच्चका रअ़दस। अक्कु नीन करम दे:वन सुमरारअय अरा गछरअय का इन्ना ती नीन अन्ने मल ननोय। गो:दो करम दे:वन ओ’लग्गिया अरा गच्छरा का आद धरमी आलारिन मल सा:धओ।‘‘ कत्थन मेनर करमस, करम डा:ड़न गो:दो गने ओं:सोरताचस चिच्चस। करम डा:ड़ा गही गो:दो मर्इयां ओंसोरनुम गो:दो कोड़े मंज्जा केरा अरा दव कुना ओ:गनुम करमा सिन तरकूटी अँड़सताचा चिच्चा। तरकूटी अंड़सर करमस बा:चस - नीन धरमेस ही ना:मे ती पुजा ननु ओण्टे सोना-रूपा अइत्तका आ:लिन नीन मुक्की रअ़दी अउलातिम निंगहय कूल नुंज’र्इ, एन्देर गे का अबड़ा सोना-रूपा निंगहय कूल नुम रअ़र्इ। एका गूटी अबड़न नीन कूल ती बहरी मल ओथोरओय अवन्दा गूटी निंगहय कूल नुंजना मल मेटेरओ। करमस ही कत्थन मेनर गो:दो बा:चा - अना भर्इयो, से एंगहय दुक्खेन गा तिंगकय, अक्कु एंगहय दुक्खेन हूुं नीन लेले होआ, बअर आद उरमी सेना-रूपन कूल ती बहरी ओत्थरा दरा करमस गे ची लघचा। करमस गो:दो गुसता सोना-रूपन धरचस दरा किर्रा हेल्लरस। डहरे नु रो:गे ती लिटलिटा मंज्जका बे:लस ख़क्खरस। आस मेंज्जस - ‘‘एन्देर गे एंग्गन एन्ने रो:गे मंज्जा। ‘‘ख़ने करमस बा:चस - ‘‘नीन निंगहय रा:जीन दव कुना मल चलाबअ़दय अरा नन्ना मुक्कर गने रअ़दय। अवंगे धरमेस निंग्गन दाँड़े चिच्चस। ‘‘अक्कु करम दे:वन ओलग्गा अरा गछरआ का इन्ना ती अन्ने मल ननोय। रोगाहा बे:लस करम देवन ओं:सरस की ओ’लग्गियस अरा गच्छरस का अक्कु नन्ना आ:लीर गने मल रओस दरा रा:जिन दव कुना चलाबओस। अन्ने गछरका ख़ो:ख़ा आस कोड़े मंज्जस केरस अरा तंगहय बखड़े चला केरस। अन्तिले डहरे नु दुधी बीसुस ख़क्खरस। आस करमा सिन मेंज्जस का - ‘‘आस गही ओये दुधी एन्देर गे मल चि‘र्इ ? ख़ने करमस तिंग्गयस -‘‘नीन धरमेस गही पूजा ननुर गे दुधी रअ़नु हूँ दुधी मल चिअ़दय अरा आ:रिन ठकदय अवंगे धरमेस निंग्गन दाँड़े चिच्चस।‘‘ नीन करम देवन ओलग्गा अरा गछरआ का अक्कु अन्ने मल ननोय। दुधी बीसुस नेवख़रस की करम देवन ओ’लग्गियस अरा गच्छरस का अक्कु आस मलकोड़े नलख मल ननोस। अदी ख़ो:ख़ा करमस करमन ओये नु ओंसोता:चस चिच्चस। करम गने ओंसोरनुम ओये कोड़े मंज्जा केरा अरा दुधी चिआ हेल्लरा, ख़ने करमस उच्छ तिंघआ दुधी ओण्डस की एड़पा किर्रा हेल्लरस। डहरे नु आ अलख़ड़ा बीसुस ख़क्खरस। आस मेंज्जस - ‘‘एन्देर गे एंग्हय अलख़ड़ा मल चुंज्जुर‘र्इ। ‘‘ख़ने करमस बा:चस - ‘‘नीनु धरमेस गही नामे ती उबस‘ऊ आलररिन पड़गदय अवंगे धरमेस निंग्गन दाँड़े चिच्चस। ‘‘अक्कु करम दे:वन ओलग्गा अरा गछरआ का इन्ना ती अन्ने मल ननोय। अलख़ड़ा बीसुस करम देवन ओं:सरस की ओ’लग्गियस अरा गच्छरस का अक्कु धरमेस गही नामे ती उबस‘ऊ आलररिन मल पड़गोस। अन्ने नंज्जका ख़ो:ख़ा आस गही अलखड़ा चुंज्जरआ हेल्लरा तसले करमस उडुच लिंघआ मोक्खस की एड़पा किर्रा हेल्लरस। जोक्क गेच्छा डहरे केरका ख़ो:ख़ा आ पलख़ंज्जा इद’उस ख़क्खरस। पलख़ंज्जा इद’उस मेंज्जस - ‘‘एन्देरगे एंग्हय पलख़ंज्जा पोका मनी। ख़ने करमस बा:चस - नीन धरमे सिन सार‘ऊर अरा कूल-की:ड़र गे पलख़ंज्जा रअ़नु हूं मल चिअ़दय, अवंगे निंगहय पलख़ंज्जा पोका मनी। अन्ने बअर करमस करम डा:ड़न पलख़ंज्जा ख़ोप्पा मय्याँ ओंसोरता:चस चिच्चस, ख़ने उरमी पलख़ंज्जा कोड़े मंज्जा केरा। अन्तिले करमस उड़ुच लिंघआ पलख़ंज्जा मो:ख़र असते की मुन्दहारे का:ला हेल्लरस। का:नुम-का:नुम डहरे नु आ पोखारी ख़क्खरा। करमस पोखारी गुसन अंड़िसयस ख़ने पोखारी मेंज्जा - एंगहय अम्म एन्देर गे ख़ें:सो मनी। ख़ने करमस बा:चस - नीन धरमी आ:लर रिन हूं निंगहय अम्मन ओना मल चिअ़दी अरा तंगआ पइकर गने एलेगताअ़दी, अवंगे धरमेस निंग्गा दाँड़े चिच्चस। अक्कु नीन करम देवन ओलग्गय अरा गोहरारअय का इन्ना ती नीन अन्ने मल ननोय। पोखारी अन्नेम गच्छरा का आद अक्कु ने:कन हूं मल एलेगतोओ। एन्ने गछरका ख़ो:ख़ा करमस करम देवन अम्म नु ओंसोरताचस चिच्चस। करमदेव गही ओंसोरतेम पोख़ारी ता अम्म निरंग मंज्जा केरा। तसले करमस हिंछा पूरती अम्म ओण्डस। अन्तिले मुंज्जा नु डोम्बारी मन्न ख़क्खरा। डोम्बारी बा:चा -‘‘एंग्हय ख़ंजपा एन्देर गे पोचगो मनी। ‘‘ख़ने करमस बा:चस - निंग्हय मूली नु ढेर बग्गे ख़ंलब ढिबा र‘र्इ। एका गूटी आद चड़रअर की मलकर गे मलता कीड़ा सा:र’उर गे मल ख़टरतारओ आ गूटी निंगहय दुक्खे मल बोंग्गो। कत्थन मेनर डुम्बारी बा:चा - ‘‘अना भर्इयो, र्इ नलखन गा नीनिम नना ओंग्गोय, से अवन्दा गूटी करम देवन एंग्हय मय्याँ उर्इया चिआ। अन्तिले करमस अन्नेम नंज्जस। करमदेव गही डोम्बारी गने ओंसोरतेम उरमी पोचगो डुम्बारी कोड़े मंज्जा केरा। संगे-संगेम करमस डुम्बारी मूली गुसन गड्डका गगरा ढिबन चड्डस चिच्चस अरा उड़ुच लिंघा डुम्बारी मोक्ख़स दरा गगरा ढिबन ख़ट्टनुम-ख़ट्टनुम तंगआ एड़पा किर्रयस।
र्इ लेखे करमस करम देवन होच्चस की एका उल्ला एड़पा अँड़िसयस, अऊलम करम उल्ला रहचा। एड़पा अँड़िसका ख़ो:ख़ा एड़पा ता ओरमा भइया-बहीन अरा ख़द्द-ख़र्रर जुम्मरर चा:ली-बखड़े नु करम गड्डर मइन सिरे पुजा-धजा नंज्जर दरा नन्ना उल्ला नी:न्दका ख़ाड़ नु बोहाबा:चर चिच्चर। पुजा-धजा नंज्जका ख़ो:ख़ा मुसुरकुट चें:प बरचा दरा ख़ा:ड़-ख़ोसरा नी:न्दया केरा अरा केरमे-केरमे रा:जी किर्रा हेल्लरा, रोग-बलय कोड़े मना हेल्लरा। आ:लर धरमे अरा धरमी सवंगन ओहमा पा:ड़ा हेल्लरर। अउला हूँ भादो चन्ददो ही बिल्ली पक्खे ता दोयओन्दता उल्ला करम गड़तारकी रहचा। करमा-धरमा गर हूँ तमहँय उज्जना गूटी पद्दा-ख़ेप्पा, एड़पा-पल्ली नु दव कुना उज्जयर-बिज्जयर। जऊनी गही बेंज्जा सुघड़ कुना जों:ख़स गने मंज्जा अरा आर गही ख़द्द-ख़र्रा कोड़े-कोड़ेम उज्जयर-बिज्जयर। अबड़ा पुरख़र गही नंज्जका तिंग्गका लेखेम र्इ नेला हूँ ननतार‘र्इ अरा करम परब मनाबातारनुम बरतारआ लगी।
अक्कुन हूँ एका ओरतर मइन सिरे करम देव गही सेवा-सुसर नननर, आर गही करम-कपड़े कोड़े मनी, एन्देर गे का करम देव गही रूपे नु धरमेस गही दिम पूजा-धजा मनी, संगे-सगेम भर्इया बहीन मझी नु लोल्ला अरा मइनता मेच्छा परदी। ख़ो:ख़ा नु करमस एका लेखे पद्दा-पद्दा, कुद्दा-कुद्दा करमदेव गही महबा तेंग्गा हेल्लरस का करम देव गही दोवा ती ससर्इत दुक्ख़-दन्द बोंग्गा अरा एका पद्दा नु एकासे ससर्इत ख़क्खरा अरा एका बेसे ससर्इत ती नेब्बा मंज्जा आ बेसेन पद्दा गइनका जुदा-जुदा उल्ला करम गड़तारआ हेल्लरा अरा अक्कुन गूटी अन्नेम गड़तारनुम बरआ लगी।
(संकलन - डॉ0 नारायण उराँव ‘सैन्दा’)